好耐無整野食… 過去o個大半年, 工作都好忙, 忙到有時間抖既時候都唔想整野… 早排心血來潮, 突然好想食炆冬菇… 於是整左一大兜發財好市。第二日帶左d返公司俾同事試, 得到既comment都ok bor~ 多謝俾面。 食完咸, 當然有甜… 是我最拿手的甜點。收左山大半年, 聖誕又快到, 要預備好多唔同既小禮物, 小甜點… 所以又係出山既時候。舊年既呢個時候, 我整到好瘋狂, 嚇親成班同事。咁耐無整, 要warm up一下, 整左chocolate muffin… 好味呢~ 咁耐無整都無失手… 嘻嘻!!
平時煲親都係老火, 最近個腦好塞, 諗唔到煲咩野湯飲好… 把心一橫滾個湯, 唔洗煩, 仲要快靚正~ 材料: 節瓜2個, 肉片200克, 咸蛋1隻 醃料: 生粉1茶匙, 糖1茶匙, 鹽 & 胡椒粉 &麻油少許, 生抽1湯匙 做法: 用醃料將肉片醃15分鐘, 將節瓜切片。將6碗水煲湯, 落節瓜及肉片, 慢火滾30分鐘, 最後下咸蛋, 邊落邊用筷子攪拌湯成蛋花, 再用細火滾15分鐘 (我最喜歡滾30分鐘, 咸蛋出味D~), 即成。最後可試試味, 如果唔夠咸, 落少許鹽調味~
今晚一口氣煮左5樣野~~ 大熱天時, 要閉響廚房, 煮咁多樣野, 真係好熱… 煮完之後直頭唔多想食, 同埋流晒汗!! 蒜蓉炒翠肉瓜 香草焗新薯 香茅雞中翼 七味魷魚 蕃茄什錦海鮮長通粉 最近實在太忙, 所以很久沒有在家煮咁大鑊dinner了~ 今日由下午到超市買食材, 到回家準備, 至晚上煮起上來, 都有點不在狀態似的。
咁多部相機…最鍾意用LOMO魚眼機影… 總覺得好隨意咁舉機拍, 都可以拍得很有FEEL。 攝於2006@London…
這款曲奇很易整, 而且深得同事喜愛。早排足足encore了幾次, 做了幾次這個曲奇帶回公司給同事吃~ 這款曲奇最好的地方是鬆脆, keep的時間也比較長。 材料: 1) 低筋麵粉 140g 2) 無鹽牛油 100g 3) 砂糖 70g 4) 蛋 40g (2/3隻左右) 5) 雲呢拿香油 半茶匙 準備工作: 1) 將蛋置室溫; 牛油置室溫退冰 2) 低筋麵粉過篩 3) 在焗盤上墊牛油紙; 預熱焗爐 170度 做法: 1) 牛油退冰變軟後, 放入容器打發成cream狀。再慢慢加入砂糖用打蛋器打至奶白色為止。 2) 分兩至三次慢慢加入已打散的蛋汁, 拌勻。 3) 加入雲呢拿香油拌勻。 4) 分兩至三次慢慢加入低筋麵粉, 拌勻。(拌勻的過程中, 比較需要用力, 而且要留意是否已經完全拌勻!) 5) 將麵糊倒進擠花袋, 於已墊上牛油紙的焗盤上擠出喜歡的形狀。 6) 放入焗爐, 約焗15分鐘, 曲奇表面呈金黃色, 即成。
好鍾意食酸野… 蒸排骨裡, 最鍾意吃梅子蒸排骨, 因為酸酸地, 佐飯一起吃, 最開胃, 可以比平時吃多一些飯。 這個菜早一兩個月已經整完, 影左相, 但一直都忙著唔得閒寫blog…襯現在有時間, 分享下先~ 梅子蒸排骨 材料: 腩排 $20 酸梅+甜麵豉 (在街市的雜貨舖有售, 通常跟店主說買酸梅想做梅子蒸排骨, 佢都會俾一包已經撈左甜麵豉同埋酸梅我, 好方便, 大約只係$5左右!) 蒜蓉 做法: 1) 將酸梅兩粒壓爛,加入3茶匙甜麵豉及一茶匙蒸蓉拌勻,待用。 2) 腩排加入調味料(生粉 2茶匙, 鹽 1/4 茶匙, 糖 2茶匙, 油 1/2茶匙, 豉油 1湯匙, 麻油及胡椒粉少許, 水 1湯匙)拌勻, 再加入早前已準備好的酸梅醬, 醃半小時。 3) 大火蒸12分鐘至熟即成。
我很愛吃苦瓜。 苦瓜, 最好越苦越甘越好。 怎樣去煮苦瓜我也喜歡, 苦瓜黃豆排骨湯啦, 苦瓜牛肉飯, 苦瓜炒蛋 , 苦瓜汁啦, 我也喜歡。相信苦瓜在我的排行榜, 僅次於蕃茄!!! 對於我這個常燥底的人, 吃苦瓜很好, 清熱下火, 最適合我啦~ 早排跟同事說起年假去哪裡玩, 我想起了沖繩, 她們即說一定悶死我, 又沒有什麼shopping, 周圍都是苦瓜苦瓜苦瓜。她們一定不知道其實我很喜歡吃苦瓜, 去到沖繩可以吃過夠!! 沖繩產的苦瓜味甘而且多汁, 瓜面是深綠色的, 佈滿的疙瘩密密麻麻, 切開一片片時, 我總覺得很漂亮~ 今天去Apita, 見到feature了沖繩苦瓜, 想也不用想便決定買下一個回家煮沖繩菜中必吃的 – 苦瓜炒豬肉。 不過這次的recipe不是正宗的沖繩煮法(沖繩煮法要加味淋, 蛋也是預早炒好,而不是最後炒的), 反而是綜合了平常吃苦瓜炒蛋的方法來煮的。 材料: 1) 沖繩產苦瓜 1個 (其實普通苦瓜也可以!) 2) 免治豬肉 100g 3) 雞蛋 2隻 準備工作: 1) 將苦瓜洗淨去籽, 切薄片約2mm厚。 2) 將免治豬肉放調味料醃約半小時。(調味料: 生粉半茶匙, 鹽1/4茶匙, 糖一茶匙, 胡椒粉少許, 油1/4茶匙, 麻油少許, 生抽一湯匙, 水兩湯匙)… Read More 苦瓜炒豬肉